قبل ما نبقى ولاد كلب !

بسم الله الرحمن الرحيم


صباح الخير جميعًا

ممكن آخد من وقتكم شوية تسمعوني ؟ أصلي متغاظ و دمي محروق و مش طايق نفسي . ليه ؟ عشان انا الناس عندي نوعين : ولاد الناس و ولاد الكلب. و أكتر حاجة ممكن تجنني لما ولاد الكلب يتجرئوا على ولاد الناس .
لما شاب , ما شاء الله ,محترم أنيق وسيم مهذب في أسلوبه تتحول مميزاته دي لعيوب تشجع ولاد الكلب على التطاول عليه إعتقادًا منهم إن دي مظاهر ضعف يبقى أكيد في حاجة مش تمام في الحكاية . و كل ذنبه إنه جروء إنه يشاور لتاكسي و يركبه , يقوم السواق اللي نفسي أعرف أنهي حيوان منوي قذر لقح بويضة معطوبة و جاب لنا عاهة بشرية زيه , مثبته بمطوة ف جنبه و راجل من نفس العينة الواطية قاعد ورا مكتفه و قاموا واخدين فلوسه و راميينه برة العربية. آه يا ولاد الكلب يا سفلة ! الشاب من دور ولادكم و مش عاطي خوانة و تعملوا كدة فيه ؟ ليه ؟ أكيد فكرتم إنه عشان شكله نضيف و محترم يبقى نحط شوية جاز وسخ على ولعة الحقد الطبقي و عليهم حجرين دناوة و قلة أصل و نقوم ساحبين لنا نفسين وساخة و نقشط الشاب و بالمرة نستمتع شوية بمنظر واحد محترم من بيئة راقية و هو قليل الحيلة بين إتنين أوساخ واطيين زينا.. و سلم لي ع الإحترام يا معلم!

طيب العيب على مين ؟ فكركم إنه على الكلبين دول لوحدهم ؟ ولا ع اللي سابهم يعملوا كدة ؟ ولا يكونشي العيب علينا إننا ولاد ناس محترمين شكلنا شيك و تصرفاتنا بتنم عن تربيتنا ؟ أصل لو الأدب و الإحترام بقوا نقيصة .. سهلة .. من بكرة ... بكرة ايه ؟ من دلوقتي نبقى ولاد كلب .. ستين كلب كمان.. و اللي يقول لنا بِم نقول له على راسك و راس اللي خلفوك و تتم!و بدل ما الواحد فينا في شنطته كتاب لهيكل ولا رواية للغيطاني يزنق معاهم مطوة ولا كَتَر , و لو ما بيشيلش شنطة يشيل موس تحت لسانه.

حلو كدة ؟ و تنقرض بقى فئة ولاد الناس المحترمين اللي الناس زمان كانوا يشوفوهم يقوموا واقفين لهم و محترمينهم . و نقى كلنا سواسية في الوطيان. كدة يعجب ؟ يريح؟

بس أنا ليا طلب من الحكومة , حيث إننا كلنا حنبقى ولاد كلب يبقى نلغي بقى قانون العقوبات, ما هو مش حيبقى له لازمة ساعتها , القانون إتحط لحماية الشخص المحترم من اللي غير محترم, يبقى ايه لازمته لما كله يبقى مش محترم؟ و نسرح رجال الأمن من وظايفهم , يالا , و كل واحد يشوف له فتوة و لا بلطجي يدفع له قرشين أول كل شهر و بكدة يبقى ضمن حمايته و حماية أهله و ممتلكاته.

هو كدة , ما هو يا تحمونا يا تسيبونا نحمي نفسنا , إنما أما تكتفونا لولاد الزنا و تسيبوهم يطيحوا فينا .. تبقى ايه لازمة القوانين اللي بنحترمها و الشرطة اللي المفروض إنها ف خدمة الشعب؟

دلوقتي إبن الناس مابقتش له هيبة ولا إحترام.. و أصبح النموذج الشهير "شاب نحيل بنظارة و ماسك في ايده كتاب و لبسه مهندم و أسلوبه في الكلام شيك" هو النموذج الأشهر لل"خاسر" أو زي ما الأمريكان بيقولوا The loser
طيب ليه ؟ الغلط دة بدأ من إمتى ؟ و مين سمح بيه ؟ على فكرة انا مش حقول العيب ع الحكومة بس , هو في عليها عيب و عيب كبير أوي أوي لأن لما الحكاية اللي بتكلم عنها دي تنتشر بالشكل دة و نتثبت جوة التاكسيات و الشوارع بل و في بيوتنا و عربياتنا تبقى في مشكلة و مشكلة خطيرة كمان في أداء الأمن لوظيفته , لكن العيب كمان على إبن الناس اللي مش عارف يدافع عن نفسه .. يعني أنا مثلا , الحمد لله إبن ناس من عيلة محترمة خريج Collège Saint-Marc يعني تعليمي راقي , مثقف و شيك في مظهري و أسلوبي , لكن تعالى كدة هات لي واحد من كناسة الأرصفة يغريه أدبي إنه يتنطط عليا , و الله العظيم أعلقه من قفاه بلبوص لحد ما يبان له صاحب أعلقه جنبه ! أُمال ! هي دي فيها هزار ؟ و لما يتعودوا ولاد الكلب الرعاع إن إبن الناس بيعرف يرد , حيتلموا و حيقفلوا على وساختهم بينهم و بين بعضهم .. و حيعرفوا إن لما ولاد الناس يتواجدوا في مكان , كله يحترمهم و يلم لسانه و ايده عن العيب. و على فكرة دي مش حاجة غلط , أنا لما أوقف واحد حيوان واطي عند حده فأنا بكدة بحافظ على هيبة أبناء فئتي , المحترمين , لأن مش كلهم يقدروا يدفعوا الأذى , إنما الهيبة العامة لأي فئة , بيحققها تعاون المنتمين لها على حفظها , لكن طبعًا في حدود الأخلاق و القوانين الإلهية و الوضعية اللي بتحكم المجتمع .

معلش لهجتي عنيفة و حادة , و ألفاظي فلتت مني , بس أصلي فعلا متغاظ بشكل كبير , خاصة إن اللي حصل له الموقف اللي حكيته فوق , أخ و صديق عزيز جدًا و غالي عليا , و أنا عارف قد إيه هو إنسان راقي و محترم , و مش قادر أتخيل إن المسافة بين حياته وسطنا و خسارتنا له كانت كام سنتي تضغطهم إيد نجسة ماسكة مطوة مصدية زي نفسية حاملها , و لأني كنت فعلا حاسس بالعجز و قلة الحيلة و أنا بقول له :"أنا عايز أقول لك خلي بالك على نفسك بس مش قادر , لأني عارف إنك فعلا بتخلي بالك على نفسك و إن دة ما بقاش كفاية عشان دة ما يتكررش " شفتوا وصلنا لإيه ؟ألف بعد للشر عنك يا صاحبي و عن أمثالك , و ربنا يحفظنا جميعًا من الشر و السوء .

وليد



أغنية شعرت أنها تعبر بشدة و بسخرية مرة عن ما أتحدث عنه !