ال"إسمه إيه

أنا أطالب حكومتنا الرشيدة , بس يا واد بطل قلة أدب و مشيها رشيدة , أطالب حكومتنا الرشيدة إنها تزود خانة تالتة لخانات النوع في الأوراق الرسمية , بحيث تبقى الإختيارات : ذكر- أنثى – إسمه إيه .

ما هو أصل عيب أوي شاب في سني و خبرتي و ثقافتي , يقف متنح ربع ساعة عاجز عن تصنيف الكائن أبو شعر عُرف ديك و بنطلون حجره مدلدل بيسلم ع الأرضية , و وسطه مهرهر و عارض على أمة لا إله إلا الله و الأمم الأخرى لون و نقشة بوكسر جنابه , فضلا عن لظاليظ اللحم أو عظام حوضه –حسب تخنه أو نحافته- اللي مكشوفة ع البحري في المساحة العريانة بين البنطلون المهرهر سالف الذكر و التي شيرت البينك أبو ترتر على شكل علامة آرماني و كل دة كوم و الموسيقى التصويرية الناجمة عن شحتفة حضرته بالشبشب أبو صباع كوم تاني! "تشيك ..تشوك..تشيك..تشوك" في مشية بتفكرني بمشية المرحومة تحية كاريوكا في فيلم"شباب إمرأة" .

فوضت أمري للمنتقم الجبار في اللي خالف ضميره و ذمته و رجولته و كتب لواحد بالمنظر دة في خانة النوع "ذكر" . على فكرة بقى أنا بفكر أروح للنائب في البرلمان عن دايرتي و أطلب منه يعرض ع المجلس الموقر مشروع قانون يقضي بإسقاط الذكورة عن الأشكال دي , ولا هي يعني الجنسية ممكن تسقط لو واحد خان بلده و الرجولة ما بتسقطش لو واحد خان رجولته؟ هي الرجولة أقل من الجنسية ؟ طب دة أنا إن كنت محسوب على بلدي بس مواطن فأنا محسوب ع البشرية كلها راجل , يبقى أنهي تستحق الحماية أكتر ؟

لأ و يا أخي تلاقيهم في كل حتة , كل نصيبة أروحها ألاقي منهم , كتروا كتروا يعني ! و تشوف الواحد منهم تبقى حاسس إنك عايز تغسل إيدك كدة من الباب للطاق , تحس بحالة نجاسة في الجو ! و تدور على حتة مفيهاش أشكالهم الضالة , إنسى! ما تلاقيش ! مش بقول لك في كل نصيبة ! و تشوف الواحد منهم من ورا ما تبقاش عارف دة ولد ولا بنت , يا دي النيلة ! طب نبصبص إزاي بقى ؟! دة بقى غَض بصر إجباري ! يعني لا طولنا نستمتع بالبصبصة ولا طولنا ثواب غَض البصر اللي بالمزاج ! شفتو النيلة اللي إحنا فيها ؟!

و المصيبة الكبرى بقى إن البلاوي دي تطاردك حتى في بيتك , تفتح التلفزيون تقلب في قنوات الأغاني , أهو صوت يعمل حِس في البيت , تلاقي خير اللهم اجعله خير , حاجة كدة شعرها ملزق و طالع في كل الإتجاهات , و صوت مسرسع ولا أجدع عرسة في موسم التزاوج , و قميص , غالبًا بترتر , صدره مفتوح كله و الشيء اللي بيغني واخد وضع المغص الكلوي و مِصَدَر لك شعر صدره كأنه بيقول للعالم "هييييه ! أنا عندي شعر في صدري ! هيييييه ! أنا دكر !" مش عارف أنا إيه حكاية شعر الصدر مع العيال دي ! منه لله المطرب النحنوح السنتيح إياه اللي عمل للعيال هبل ! على فكرة بيقولوا بوستر الألبوم الجاي بتاعه مش حيطلع فيه وشه و حيطلع بداله شعر صدره ! ياكش يولع هو و شعر صدره في يوم واحد !

المهم , مش عارفين نخلص منهم لا برة ولا جوة. لأ و في عملية تحول غريبة بتحصل لنسبة كبيرة من الجيل الجديد , يبقى الواد زي الفل نضيف و شكله محترم , بس يعدي 13 سنة و شنبه يزغب و صوته يخشن شوية و تبتدي الخيبة بقى , تظهر عليه أعراض التحول , حاجة كدة زي اللي بتظهر على اللي مصاصي الدماء بيعضوهم و يبقوا مصاصين دماء زيهم , بس ع الأقل مصاص الدماء غالبًا بيكون راجل ! إنما دول ... أقول ايه ؟! حاجة تغيظ يا جدع . طيب اسمعوا دي , من كام سنة طلعت قدام بيتي عمارة جديدة , صاحبها راجل طيب و جدع , و إبنه شاب شكله طالع راجل و جدع زي أبوه . الولد فتح سايبر تحت العمارة و مسكه , حلو , علامة على تحمل مبكر للمسئولية, و هو ولد شكله محترم و اتعاملت معاه قبل كدة و لاحظت إنه ذوق و مهذب ,و ابتدا السايبر يشتغل , لحد دلوقتي و تمام . دوشة ؟ يا سيدي ماشي , شباب و عايزين يهيصوا , إزعاج ؟ مفيش مشاكل ما كلنا كنا مزعجين زمان , أنا شخصيًا كنت كوبانية إزعاج حقيقية ! إنما تعالى بقى شوف اللي حصل من كام يوم .

أنا قاعد ع السرير مأنتخ بقرا في كتاب و ألاقي لك من ناحية السايبر صوت أغنية "العبد و الشيطان" عارفينها ؟ بتاعة "ما تطلع و تبقشش لما انت ابن لذينَ .. ما تولع و تحشش ولا احنا ف بنزينة .. و جوجوجوجوجوجوجوجوجوجو.. إحم " لا مؤاخذة يا شباب أخدتني الجلالة! المهم , أنا جريت فتحت البلكونة أشوف مين المزعج اللي مشغل العك دة , و ألاقي لك يا معلم منظر لم و لن أنساه : الأخ صاحب السايبر , الشاب اللي زي الورد , واقف-الساعة 3 العصر- مِقَنبَر و مفلقَس و مصدّر القُلة لباب السايبر و بيفرج الطريق العام على رشاقة هزة وراكه و هو فرحان و منتشي و عمال يهز بهيستيريا و عنف تقولش في فار مزنوق في فتحة شرجه ! يخيبك واد ! و انا اللي عمال أقول فيك و في أخلاقك شعر ؟! لأ و لما تعرف مدى إحترام و وقار سكان المنطقة اللي أنا ساكنها تتخيل رد فعلي و انا بشوف المنظر دة على مسافة أقل من 15 متر من بلكونتي !! و الله العظيم كان هاين عليا أنزل له الشارع أقلعه بلبوص و أعلقه من رجليه و أقلع له الحزام و فين يوجعك ! دي خيبة إيه دي يا ربي ؟!

و أسيب البيت , و أنزل برة , و برضه ألاقي المناظر بنت ستين في سبعين قدامي : واحد ملزق شعره بتفافة و رافعه على فوق , واحد لابس باجي حجره جايب ركبه و ماشي مفرشح تقولشي لسة مطاهرينه , واحد لابس قميص مشجر بألوان غريبة حاجة كدة تقولش مفصل ستارة حمام بيتهم قميص ولا واخد حتة من ملابس أمه الداخلية , واحد لابس قميص دانتيل نص شفاف بترتر و ماشي ساحب كلب لولو حاجة كدة تتحط صورته في القاموس و عليها سهم مكتوب فوقه "كوكو رسمي و برخصة" ! حاجة تقرف ! حدش يجيب لهما عربية البلدية اللي بتصطاد الكلاب الضالة , تلم العيال دي ع الصحرا و تطخم كام عيار و تريحنا منهم ؟!

على فكرة دة وباء , وباء و بينتشر ! الواحد يشوف الراجل بالليل راجل يصحى يلاقيه بقى زنوبة ! و الحكاية دي لو إتسكت عليها مش حنخلص ! حنلاقي كل يوم جحافل من ال"إسمهم ايه" بتحتل كل حتة و الرجالة حيبقوا صنف يُخشَى عليه من الإنقراض !

عشان كدة أنا بقول لحكومتنا الرشيدة , يوووه ! ما قلت إهمد و إسكت و مشيها رشيدة , بقول لها :" لو سمحتي يا حكومة , إعملي خانة نصنف فيها الكائنات دي , و لحد ما يتفق دكاترة الذكورة و أمراض النسا على تصنيف نسميها خانة ال"إسمه ايه" .. و تبقى لهم علامة مميزة يربطوها على دراعهم , ولا بلاش علامة هم أساسا متعلمين , بس المهم إعملوا لهم تصنيف ! ما هو يا كدة يا تبتدوا من دلوقتي تعملوا للرجالة محمية طبيعية , يعني هو أنا كراجل أقل أهمية من سلحفاة الشمردل اللي مانعين صيدها في محمية راس محمد ؟! أنا بطالب بحماية النوع الرجولي من الإنقراض , و ياللا أهي سبوبة حلوة عشان لما تعملوا كدة حتلاقوا باب رزق من ناحية اليونيسكو و جمعيات حماية البيئة البرية ! يعني الموضوع مش حيكلفكم حاجة!

اعملوا اي حاجة المهم إنقذونا أحسن خلاص الواحد بقى حاسس إن رجولته بتنتهك و هو شايف الأشكال دي و مدرك الحقيقة المرة إن كل كوكو فيهم معاه بطاقة , تحمل بكل تحدي و صفاقة و تجاهل لحقيقة الرجولة , كلمة "ذكر" !

وليد فكري